Nakipag-ugnayan ang Community Affairs Division ng Provincial Government of Camarines Norte sa pangunguna nina Governor Ricarte "Dong" Padilla at Vice-Governor Joseph Ascutia upang ipamahagi ang kabuuang 2.3 milyong piso bilang tuition fee at reimbursement sa 625 na benepisyaryo ng CNPGCEAP.
Bago ang pamamahagi, isang oryentasyon ang idinaos para sa mga benepisyaryo na mag-aaral mula sa pampubliko at pribadong paaralan sa buong probinsya. Dito, tinalakay ang kahalagahan ng edukasyon at ang papel ng gobyerno sa suporta sa kanilang pag-aaral. Naihayag din ang transisyon ng nasabing opisina mula sa pamumuno ni Mr. Abel Icatlo at sa pormal na pagkakatalaga ng bagong officer-in-charge Camarines Norte Provincial Information Officer na si Dr. Sarah Marie Pante Aviado.
Sa kanyang mensahe, ibinahagi ni Provincial Administrator Don Eduardo Padilla ang madalas na pahayag ng Gobernador na kailangan ng sakripisyo upang makamit ang tagumpay at higit sa lahat, makatulong sa pamilya.
Pinangunahan naman ni Mr. Marcial Ferrer ang oryentasyon sa mga college grantees kaugnay sa tamang proseso at iba pang mga alituntunin.
Ipinamahagi ang tig-tatatlong libong piso (3,000) sa 383 grantees na nag-aaral sa Camarines Norte State College (CNSC). Sa kabilang banda, nakatanggap naman ng tig-lilimang libong pisong (5,000) tuition fee reimbursement ang 242 grantees na nag-aaral sa mga pribadong paaralan. Sa kabuuan, umabot sa 2.3 milyong piso ang naipamahagi sa 625 college grantees sa buong lalawigan.
article credits to: https://www.facebook.com/piocamnorte
