CSC: DANGAL NG BAYAN AWARD TINANGGAP NI DR. REX BERNARDO

Details: Category: News and Information; Published: 16 February 2024; Hits: 234

Ang Civil Service Commission (CSC) ay isinapubliko ang sampung napiling natatanging mga opisyal at kawani ng pamahalaan para tumangap ng parangal na Outstanding Public Officials and Employees Award para sa taong 2023, na kilala rin bilang Dangal ng Bayan Award

Ang dedikasyon at pagmamalasakit ni Dr. Rex Adivoso Bernardo - Camarines Norte Provincial Disability Affairs Office sa kanyang trabaho at sa komunidad ay kinilala bilang isa sa sampung napili upang tumanggap ng nasabing parangal. Ang pagpili ay masusing tinalakay, pinag-usapan at pinagtibay ng Committee on Awards for Outstanding Public Officials and Employees, o Dangal ng Bayan.

Mismo si Pangulong Ferdinand R. Marcos Jr. ang nagbigay ng parangal sa Awards Rites para sa Outstanding Government Workers sa Ceremonial Hall, Malacañang Palace nitong ika-14 ng Pebrero, 2024. Ang Dangal ng Bayan Award ay isa sa tatlong kinikilalang pinakamataas na karangalan na maaaring matanggap ng lingkod-bayan sa kanyang gampanin sa gobyerno at ang pinaka-aasam na pagkilala na ipinagkakaloob ng Pamahalaan ng Pilipinas sa mga indibidwal o grupo, kabilang din ang Presidential Lingkod Bayan at CSC Pagasa Award sa dalawa pang karangalan na maaaring matanggap.

Ang pagkilala kay Dr. Bernardo ay nagpapakita ng kanyang matibay na pagsusulong sa adhikain at mga gawain para sa mga taong may kapansanan. Ang kanyang trabaho ay may malaking epekto sa buhay ng mga taong kanyang pinagsisilbihan, kaya't siya ay karapat-dapat na tumanggap ng parangal.

Layunin ng parangal na kilalanin at parangalan ang mga indibidwal na nagpakita ng halimbawa at di-matatawarang pagganap sa kanilang mga papel at responsibilidad, na malaki ang naitulong sa pagpapabuti ng serbisyong pampubliko sa Pilipinas.

Binabati ng CSC ang lahat ng mga ginawaran at kinikilala ang kanilang malaking ambag sa serbisyo-publiko. Ipinakikita ng mga indibidwal na ito ang mataas na pamantayan ng serbisyo, na nagiging inspirasyon.

Naging isang malaking okasyon ang seremonya ng pagkilala, na nagbibigay-pugay sa mga natatanging indibidwal na naglaan ng kanilang buhay sa serbisyo-publiko. Ito ay isang pagdiriwang ng diwa ng serbisyong pampubliko, na nabibigyang pansin sa kahanga-hangang gawain ng mga ordinaryong indibidwal na nagmamalasakit sa kapakanan ng kanilang kapwa Pilipino.

Samantala, ang naging malaking okasyon ay hindi pinalampas na masaksihan ng laging nakaagapay at nakasuportang Ama ng Lalawigan, Gobernador Ricarte “Dong” Padilla na dumalo kasama ni Dr. Rex. Bernardo. Isang patunay na maraming lingkod-bayan ang may tunay na malasakit sa kapwa at sariling atin, tubong Camarines Norte.